「藥劑師，我隻眼呢兩日又紅又痛，眼皮仲突起咗粒嘢，係咪生眼挑針？使唔使即刻睇醫生？敷熱毛巾有用定敷冰有用？」

呢個係社區藥房好常見嘅查詢。眼挑針雖然唔係大病，但痛起上嚟真係好困擾，仲會影響外觀。今次就同大家拆解眼挑針嘅成因、正確處理方法，以及社區藥房可以提供嘅藥物諮詢支援。

一、乜嘢係眼挑針？點解會生？

眼挑針嘅學名係麥粒腫（Hordeolum / Stye），簡單嚟講就係眼瞼嘅皮脂腺或油脂腺受到細菌感染（最常見嘅係金黃色葡萄球菌），引致急性發炎化膿。

眼瘡其實分為兩類：

常見誘發原因包括：

• 用手捽眼：將手部細菌帶到眼瞼腺體
• 化妝卸得唔乾淨：眼線筆、睫毛液堵塞腺體出口
• 戴隱形眼鏡習慣唔好：清潔唔足或戴住過夜
• 睡眠不足、壓力大：免疫力下降，油脂分泌失調

高危一族包括小朋友（成日捽眼、腺體未成熟）同經常化妝嘅女士。

二、居家護理熱敷係關鍵

發現眼皮開始紅腫微痛嗰陣，最常見嘅處理方法就係 「熱敷」，熱敷可以幫助暢通被堵塞嘅油脂腺，促進血液循環，有助膿液自然排出同消腫。

一般做法：

• 用乾淨毛巾沾約40°C溫水，揸乾後敷喺患處
• 每次敷 10至15分鐘
• 每日重複 最少3至4次
• 持續敷 1至2星期，直至症狀消退

另一個方法： 用烚熟嘅熱雞蛋，用乾淨薄毛巾包住嚟敷，效果一樣好。

三、絕對禁忌：千祈唔好用手擠！

眼皮周圍血管密集，同腦部靜脈竇相通。用手擠壓或自己用針刺破，極易將細菌推得更深，可能引致嚴重嘅 眼眶蜂窩組織炎。

另外要留意：如果眼挑針炎症明顯或痛楚加劇，應該 停止熱敷，改為短時間 冷敷 嚟減輕不適。

幾時要即刻睇醫生？

雖然大部分眼挑針可喺1至2星期內經熱敷及基本護理後自行消退，但若出現以下情況，請務必盡快求醫：

• 影響視力：腫塊過大壓住角膜，導致視力模糊
• 紅腫擴散：紅腫唔止喺眼皮，已擴散到眼眶甚至面部
• 劇痛或發燒：伴隨發燒、極度劇痛或大量膿液流出
• 反覆發作或幾星期唔退：可能已轉為霰粒腫，或需眼科醫生處理
• 長者反覆出現眼瘡：需留意會否係其他問題嘅警號，應盡快求診

四、社區藥劑師可以點樣幫到你？

若熱敷後仍感不適，或想了解藥物選擇，可以到社區藥房諮詢註冊藥劑師。藥劑師會了解你的症狀、持續時間及健康狀況，然後提供相關資訊與建議。

1. 眼藥水／眼藥膏

藥劑師可就市面上嘅非處方眼藥水或眼藥膏提供資訊，包括不同產品嘅用途、正確使用方法及注意事項。藥劑師會根據你的情況，建議適合嘅產品類別，並指導你點樣安全使用。

若需同時使用眼藥水同眼藥膏，一般建議先滴眼藥水，隔5至10分鐘後再塗眼藥膏。

眼藥膏正確使用步驟：

• 用梘液徹底洗淨雙手
• 打開瓶蓋，注意唔好接觸藥膏管口
• 頭向後仰，眼向上望，輕輕拉開下眼皮
• 擠出約1厘米長嘅眼藥膏入下眼皮內
• 唔好讓管口接觸到眼睛、睫毛或眼皮
• 閉眼片刻，再眨眼幾次，令藥膏均勻分佈
• 用乾淨紙巾抹走多餘藥膏
• 眼藥膏開啟4星期後便須棄掉

2. 人工淚液

藥劑師可建議合適嘅人工淚液產品，幫助保持眼球表面滋潤，減少因眼挑針引起嘅異物感同不適。

總結

生眼挑針雖然困擾，但大部分情況可透過正確嘅熱敷同基本護理處理。社區藥劑師可以為你提供藥物資訊、非藥物處理建議，以及評估是否需要轉介求醫。記住：千祈唔好用手擠壓，若症狀惡化或持續不退，請盡快求醫。

如有疑問，歡迎到社區藥房諮詢註冊藥劑師。

常見問題

• 問：眼挑針可以自己買藥膏搽嗎？

答：社區藥劑師可以就非處方眼藥水或藥膏提供資訊，但抗生素類藥物必須由醫生處方。建議先諮詢藥劑師，了解適合你情況嘅產品。

• 問：熱敷同冷敷點樣揀？

答：一般情況下，早期眼挑針可先用熱敷幫助暢通油脂腺。若炎症明顯加劇或痛楚增加，可改用冷敷紓緩不適。

• 問：眼挑針會傳染嗎？

答：眼挑針本身唔係傳染病，但細菌可透過接觸傳播。患者應避免共用毛巾、枕頭套等個人物品，並勤洗手。

重要提醒：

本文僅提供健康資訊參考，並不構成醫療建議。使用任何藥物前，應先諮詢註冊藥劑師或醫生，確保適合你的情況。若症狀持續或惡化，請盡快求醫。